Xəbər verdiyimiz kimi, bu gün Naxçıvan Muxtar Respublika Stadionunda Azərbaycan Kubokunun final oyunu keçiriləcək. Saat 16:00-da başlanacaq görüşdə “Qarabağ” və “Qəbələ” klubları üz-üzə gələcəklər. 
May ayında Naxçıvanda daha bir mötəbər turnir keçiriləcək. Mayın 25-də start veriləcək Naxçıvan Kuboku yarışı  ümumilli lider Heydər Əliyevin xatirəsinə həsr olunacaq. Artıq yarışın kuboku hazırlanıb. Türkiyədə hazırlanan çempionluq kuboku xüsusidir və sırf olaraq sözügedən yarış üçün hazırlanıb. Bu gün  bununla bağlı Naxçıvan Muxtar Respublikasında tədbir keçirildi. Tədbirdə Naxçıvan Muxtar Respublikası Gənclər İdman naziri Azad Cabbarov və Peşəkar Futbol Liqasının prezidenti Ramin Musayev iştirak etdilər.
İlk növbədə Azad  Cabbarov çıxış edib, fikirlərini bildirdi: “Sizi burada görməkdən məmnunuq. Hər il may ayının əvvəlindən etibarən ulu öndər Heydər Əliyevin xatirəsinə həsr  olunmuş turnirlər keçirilir. Bu gün isə Naxçıvanda Azərbaycan Kubokun finalı keçiriləcək.  Bu həqiqətən də bizim üçün bayrama çevrilib. Azərbaycan Kubokunun finalının Naxçıvanda keçirilməsinə qərar verən Peşəkar Futbol Liqasına təşəkkür edirik.
Biz Naxçıvan Kubokunu da yüksək səviyyədə keçirəcəyimizə ümid edirik. Ulu öndərimiz Heydər Əliyevin hakimiyyəti dövründə Azərbaycanda idman sahəsində böyük dəyişikliklər olub və kütləviliyə nail olmuşuq. Bu, Naxçıvana da sirayət edib. Hazırda Naxçıvanda 2 Olimpiya  Kompleksi, şahmat məktəbləri var. Naxçıvanda  40 minə yaxın azərbaycanlı idmanın sirrlərini öyrənir. Bu gün Naxçıvanda 8 komandanın iştirakı var, daxili yarış keçiririk və işlərin peşəkar səviyyədə qurulmasını təmin edirik. Sonda bir daha qeyd edim ki, Peşəkar Futbol Liqasının dəstəyi ilə Naxçıvan Kubokunu yüksək səviyyədə keçirəcəyik. Bu tədbiri işıqlandıracağınıza, Azərbaycan ictimaiyyətinə çatdıracağınıza görə sizə indidən təşəkkür edirəm”

Daha sonra Peşəkar Futbol Liqasının prezidenti Ramin Musayev fikirlərini diqqətə çatdırdı: “Naxçıvanda təkcə futbol yox, eyni zamanda idmanın digər növlərinə də xüsusi diqqət ayrılır. Burada idmanın bütün növləri üzrə yarışlar keçirilir. Bu onu göstərir ki, Naxçıvan həqiqətən idman şəhəridir, idman bölgəsidir. Biz Azərbaycan Kubokunun final görüşünün Naxçıvan Muxtar Respublika Stadionunda keçirilməsinə qərar verdikdə, sual olundu ki,  niyə Naxçıvanda keçirirsiz? Mən də sual edirəm, niyə Naxçıvanda keçirməyək?  Naxçıvan Azərbaycanın dilbər guşəsidi, burada futbolun keçirilməsi üçün hər cür şərait var.  Bizim borcumuz belə bir gözəl məkanda gözəl oyun keçirməkdir. Finalın iştirakçısı olan komandalara uğurlar arzu edirəm. Güclü qalib gəlsin. Bizim əsas  vəzifəmiz bu oyunun keçirilməsi üçün  hər bir işi yoluna qoymaqdır.
May ayında Naxçıvanda daha bir mötəbər turnir keçiriləcək. Naxçıvan Kubokunda iştirak üçün bizə müraciət edən komandalar var, amma hələ ki adları tam açıqlaya bilməyəcəyəm. Bununla bağlı yaxın günlərdə yekun qərar veriləcək. Biz Naxçıvan Kubokunu da yüksək səviyyədə keçirmək üçün əlimizdən gələni edəcəyik".