 Avropa Liqasında II təsnifat mərhələsinin ilk oyunları çərçivəsində Polşanın "Lex" klubunu qəbul edən "Xəzər Lənkəran" hesabda önə keçsə də, üstünlüyünü sona qədər qoruya bilməyib. Hərəyə bir dəfə fərqlənən komandalar meydançadan heç-heçə ilə ayrılıblar.
Mariuş Rumak, "Lex" klubunun baş məşqçisi: "Əvvəlcədən düşündüyüm kimi, qarşılaşma çətin keçdi. “Xəzər Lənkəran” güclü komandadır. Cavab qarşılaşması olacaq. Yunis Hüseynov növbəti mərhələyə vəsiqə qazanacağından əminliyini bildirdi. Bu, onun şəxsi fikridir. Mən isə düşünürəm ki, hər iki komanda üçün çox ağır qarşılaşma olacaq. Əgər statistikaya baxsaq, görərik ki, rəqibin bəxti gətirdi. Bizim real qol epizodlarımız daha çox oldu. "Lex"in hədəfi qrup mərhələsinə vəsiqə qazanmaqdır. Bizim azarkeşlərimiz Avropada sayılıb-seçilən fanatlardır. Zənnimcə, cavab qarşılaşmasında Lənkəran stadionundan iki dəfə çox azarkeş ordusu bizi dəstəkləyəcək".
Yunis Hüseynov, "Xəzər Lənkəran" klubunun baş məşqçisi: "Biz bu gün yaxşı oynadıq. Əvvəlcədən də demişdim ki, "Lex"i keçə bilərik. Məni narahat edən odur ki, çox sadə vəziyyətdə yenə səhv edib qol buraxdıq. Mən buna qol epizodu da deyə bilmirəm. "Nımme Kalyu" ilə oyunda da belə olmuşdu. Amma bu problemin üzərində işləyəcəyik. Bununla əlaqədar futbolçularla söhbətim də olacaq. Biz səfərə yalnız qələbə dalınca gedəcəyik. Düzdür, "Lex" "Nomme Kalyu" deyil. Amma mən hələ oyundan əvvəl də söyləmişdim, özümdə indi də güclü bir inam var ki, "Lex"i keçəcəyik. Uşaqlar vuruşdular, bacardıqlarını etdilər. Yalnız son anlarda dəqiq ola bilmirdilər. Adrian Pit o vəziyyətdə fərqlənə bilsəydi, hesab başqa cür ola bilərdi. Komanda getdikcə daha yaxşı oynayır. Gələn qarşılaşmada bundan da yaxşı oynayacağıq".
|
.png)
.png)
.jpg)
