R.Musayev: “Çempionat milli komanda üçün keçirilir” 2011-12-28 |
|
Peşəkar Futbol Liqası (PFL) və Unibank Kommersiya Bankının Premyer Liqa klublarının baş məşqçiləri və kapitanları, həmçinin idman jurnalistləri arasında apardığı sorğunun nəticəsinə əsasən “İnter” klubunun hücumçusu Baçana Sxadadze dekabr ayının “ən yaxşı futbolçusu” seçilib. Bu münasibətlə keçirilən tədbirdə Baçana Sxadadze iştirak etmədiyindən PFL-in hədiyyəsi və “Unibank”ın pul mükafatı “İnter” klubunun nümayəndəsi Səbuhi Səfiyarlıya təqdim olundu.
İlk olaraq çıxış edən “Unibank”ın Marketinq Departamentinin rəhbəri Yevgeni Soltanov tədbir iştirakçılarını salamladı və sözü “Unibank”ın idarə heyətinin sədri Faiq Hüseynova verdi. “Sizi qarşıdan gələn Yeni il və Dünya Azərbaycanlılarının Həmrəylik günü münasibətilə təbrik edirəm. Artıq iki ildir ki, idman sahəsi ilə sıx əməkdaşlıq edirik. Bu gün “ilin yekunları”nı nəzər salmağa və “ayın oyunçusu”nun kim olduğunu öyrənmək üçün toplaşmışıq. Qeyd etmək istərdim ki, biz PFL ilə əməkdaşlıqdan böyük məmnunluq hissi duyuruq”.
Daha sonra çıxış edən Peşəkar Futbol Liqasının prezidenti Ramin Musayev Azərbaycan xalqını qarşıdan gələn Yeni il və Dünya Azərbaycanlılarının Həmrəylik günü münasibətilə təbrik etdi: “PFL prezidenti kimi yox, bir azərbaycanlı kimi deyim ki, seçilən “ayın oyunçusu” mənim xoşuma gəlmədi. Milli komandaya dəvət alan futbolçular “ayın oyunçusu” olmalıdır. Təəssüf ki, bu belə deyil. Bu nə sizin, nə də bizim günahımızdır. Bu, millidə oynayan və millidə oynamağa can atan gənc futbolçuların günahıdır ki, “ayın oyunçusu” legioner seçilir. Bəlkə də bəzi yoldaşlar mənim bu çıxışımı nöqsan kimi qəbul edəcək, ancaq çempionat milli komandaya görə keçirilir. Sxadadze də bizim çempionatda çıxış edən gənc futbolçudur, Gürcüstan yığmasından təklif gözləyir. Bəlkə də bu, bizim futbolçular üçün bir örnək olmalıdır. Baçana Sxadadzenin bu gün burda iştirak etməməsi də mənim xoşuma gəlmədi”.
Çıxışlar və mükafatlandırma başa çatdıqdan sonra PFL və “Unibank” rəsmiləri media nümayəndələrinin suallarını cavablandırdılar.
|
|
|
|
|
|