Bu gün Çempionlar Liqasının II təsnifat mərhələsinin ilk oyunları çərçivəsində "Zestafoni"ni qəbul edən "Neftçi" 3:0 hesablı qələbə qazanıb.
Georgi Çiaberaşvili, "Zestafoni" klubunun baş məşqçisi: "Mən deməzdim ki, "Neftçi" güclü çıxış etdi, sadəcə biz zəif oynadıq. Bu gün "Zestafoni" səviyyəsindən aşağı çıxış etdi. Siz əsl gücümüzü görmədiniz. Komandam ən pis oyununu nümayiş etdirdi. Belə oynamalıydıq. İnanıram ki, növbəti mərhələyə adlamaq şanslarımız hələ də qalmaqdadır. Ümidimizi itirməmişik".
Tərlan Əhmədov, “Neftçi” klubunun məşqçisi: "Bugünkü qalibiyyəti baş məşqçimiz Böyükağa Hacıyevə həsr edirik. Ümid edirik ki, o, tezliklə aramıza qayıdacaq. Qələbə qazanmağımıza baxmayaraq, komandada müəyyən çatışmayan cəhətlərimiz var idi. Yeni futbolçularımız adaptasiya dövrünü çox yaxşı keçdilər. Bəzən elə səviyyəli oyunçular olur ki, qısa müddətdə komandaya uyğunlaşa bilmirlər. Şükürlər olsun ki, bizdə belə problem yaşanmadı. Bütün bunları analiz edəcəyik. Rəqibin Avstriyadakı toplanış çərçivəsində və ötən il avrokuboklarda oyunlarını izləmişdik. Bu komandaya qarşı açıq oynamaq çətindir. Daha çox fərdi oyuna üstünlük verirlər. Boşluq yaratmadıq. Layiqli qələbə qazandıq. Əsas nəticədir. Çatışmazlıqlar var. Cütün taleyinin həll olunduğunu düşünmürəm. Bizi qarşıda daha çətin bir qarşılaşma gözləyir".
|