Bu gün futbol üzrə Azərbaycan
Premyer Liqasında 2012-2013-cü il mövsümünün püşkatma mərasimi
keçirilib. Saat 12.00-da AFFA-nın inzibati binasında başlayan mərasimdə Peşəkar Futbol Liqasının (PFL) prezidenti Ramin Musayev ilə yanaşı klub rəsmiləri
və KİV nümayəndələri iştirak ediblər.
Tədbiri giriş sözü ilə açan PFL-in Mətbuat və
İctimaiyyətlə Əlaqələr Departamentinin rəhbəri Aslan Şahgəldiyev püşkatmanın
keçirilmə qaydası haqqında mərasim iştirakçıları məlumatlandırdı: “Bu gün 21-ci
Azərbaycan Premyer Liqasının püşkatma mərasiminə yığışmışıq. Bunu futbol
bayramı kimi də səciyyələndirə bilərik. Bu münasibətlə hər birinizi təbrik edirəm.
Püşəkatma qaydalarında heç bir dəyişiklik yoxdur. Çempion komandadan turnir cədvəlinin
sonuncusuna doğru hər bir klub nümayəndəsi qutudakı şarlardan birini seçəcək və
beləliklə biz ilk turun qarşılaşmalarını müəyyən edəcəyik”.
Daha sonra çıxış edən PFL-in prezidenti Ramin
Musayev çempionatın keçirilməsində heç bir dəyişikliyin olmadığını bildirdi: “Bu günkü bayram abu-havası daha yüksək ola
bilərdi. Ancaq media işçiləri az gəlib və klub rəhbərlərindən heç kim iştirak
etmir. Öz işləridir, özləri bilər. Bizim üçün fərqi yoxdur. Biz borcumuzu yerinə
yetiririk. Püşkatma və çempionatın keçirilmə qaydalarında heç bir dəyişiklik yoxdur.
Çempionat yenə də eyni formatda keçiriləcək. Bəzi yoldaşları altılıq sistemi
qane etməsə də, ancaq məncə, ümumi baxışda altılıq sistemi özünü doğruldub və
bu qaydada da davam edəcəyik. Çempionat boyu çalışacağıq ki, haqq-ədalət,
düzgünlük olsun, kim güclüdürsə, o da qalib gəlsin. “İkinci altılıq”da olan
komandalar “altılıq” sisteminin düzgün olmadığını bildirirlər. Ancaq
avrokuboklardakı oyunları da nəzərə alsaq, fikrimcə, “altılıq” sistemi daha yaxşıdır”.
“Bu ilki avrokubok oyunlarından hələki narazılıq yoxdur. Düzdür “Bakı”
klubunda müəyyən anlaşılmazlıq oldu. Gözləmirdik ki, “Bakı” məğlub olar. Ancaq
bu futboldur və futbolda hər şey ola bilər. Bəzən gözlənilmədən köklü bir
komandanı adi bir klub udur. “Bakı”nın mərhələ adlamamasının birinci səbəbkarı bakıda
olan oyundakı hakimin qeyri-peşəkar qərarları oldu. Ancaq mən inanıram ki, “Bakı”
Premyer Liqada özünü daha yaxşı göstərəcək. Çünki yeni gələn futbolçular hələ
komandaya tam alışmayıblar. Bu özünü “Bakı”nın son oyununda da göstərdi. “İnter”
də çox gözəl oyun nümayiş etdirdi. Çoxları inanmırdı ki, “Xəzər Lənkəran” növbəti
mərhələyə keçəcək. Ancaq mən əmin idim ki, “Xəzər Lənkəran” mərhələ adlayacaq. Çünki
komandanın həm transferləri ilə, həm də baş məşqçisi ilə maraqlanırdıq və ən əsası
klubun rəhbəri Mübariz müəllimin komanda ilə bir yerdə olması, mənə elə gəlir
ki, futbolçulara əlavə bir güc verdi və “Xəzər Lənkəran” qələbə qazandı. İnanıram
ki, iyulun 17-də “Neftçi” də öz azarkeşlərini sevindirəcək. Hər üç klubumuza
növbəti mərhələlərdə uğurlar arzulayıram və eyni zamanda növbəti çempionatda
iştirak edən bütün komandalarımıza da uğurlar arzulayıram. Peşəkar Futbol
Liqasının prezidenti olaraq hər birinizin qarşınızda söz verirəm ki, heç bir
haqsızlığa yol verilə bilməz. Ötən çempionatda da şahidi oldunuz ki, haqsız
olan hakimlər uzaqlaşdırıldı. Peşəkar Futbol Liqasının fəaliyyətdə olduğu dörd
ildə Premyer Liqadan uzaqlaşdırılan hakimlərin sayı keçmiş 16 ildə olmamışdır. Bizim
istədiyimiz odur ki, heç kəsin haqqı tapdalanmasın. Bundan sonra da çalışacağıq
ki, daha da düzgünlük olsun. Sponsorlar qarşısında özünə bəraət qazandırmaq
üçün bəzi baş məşqçilər, futbolçular hakimləri günahlandırırlar”.
“Əksər klub rəhbərlərinin razılığı ilə yayım hüququ Peşəkar Futbol Liqasına
verildi. Biz də hazırda “İdman Azərbaycan” telekanalı ilə danışıqlar aparırıq. Artıq
90 faiz razılıq əldə olunub. Çalışacağıq ki, əksər maraqlı, lazımlı oyunları
televiziya ilə canlı göstərək. Bəzi klub rəhbərləri bizə etiraz edirlər ki,
komandalarının oyunlarının yayımlanmasını istəmirlər. Bu düzgün deyil. Azarkeşlərinə
hörmətin varsa, ən azından onların xətrinə gərək həmin oyunlar göstərilsin.Oyunlar
saytımızda da (www.pfl.az) canlı yayımlanacaq. Bunun
üçün lazım olan avadanlıqlarımız alınıb. Çalışacağıq ki, peşəkar və keyfiyyətli
yayım təşkil edək ki, televiziya vasitəsilə qarşılaşmaları izləyə bilməyən
azarkeşlər bizim saytımız vasitəsilə oyunlara baxa bilsinlər. Bacardığımız qədər
futbolumuzun inkişafı üçün çalışırıq”.
““Unibank”la razılığımız var. Hazırda “Unibank” rəhbərliyi Azərbaycandan kənarda
olduğu üçün müqaviləmiz imzalanmayıb. Avqustun əvvəlində, çempionat başlamamış
müqavilənin imzalanması gözlənilir”.
“Klublar sifariş vərəqələrini təqdim
edərkən orada stadionlarını göstərməlidirlər. . Əgər “Qarabağ” əsas stadion
kimi Suraxanı qəsəbə stadionunu göstərsə, ehtiyat meydan kimi Quzanlı
stadionunu qəbul etməyəcəm. Çünki sonra
narazılıqlar yaranır. “Qarabağ” ya Bakıda, ya da Quzanlıda oynayacaq”.
|