2015/16 mövsümünün son oyunu rekordla əlamətdar olub. Azərbaycan Kubokunun “Qarabağ”la “Neftçi” arasında final görüşü ölkəmiqyaslı yarışlarda mövsümün ən çox tamaşaçı toplayan matçı olub. Ağdam təmsilçisinin əlavə vaxtda 1:0 hesabı ilə qalib gəldiyi oyunu 23000 azarkeş izləyib.

Bunadək başa çatan 2015/16 mövsümünün rekordu Topaz Premyer Liqasında qeydə alınmışdı. Bu il fevralın 14-də Gəncədə keçirilən “Kəpəz” – “Qarabağ” görüşündə (1:2) 20400 tamaşaçı toplaşmışdı. Tofiq Bəhramov adına Respublika stadionundakı matçda bundan 2600 azarkeş artıq olub. Başa çatan mövsümdə finaladək ən çox tamaşaçı toplayan kubok matçı isə 1/4 finala təsadüf edib. “Xəzər Lənkəran”la “Neftçi” arasındakı ilk görüşü (3:2) Lənkəran şəhər stadionunda 4500 azarkeş izləyib.

Respublika stadionundakı matçda qeydə alınan nəticə Azərbaycan Kuboku tarixinin 3-cü göstəricisidir. 2009/10 mövsümünün elə bu stadiondakı finalında “Bakı” – “Xəzər Lənkəran” qarşılaşmasını (2:1) rekord sayda - 26000 azarkeş izləmişdisə, 2010/11 mövsümünün “İnter”lə “Xəzər Lənkəran” arasında həlledici matçında (1:1, pen. 2:4) 24000 tamaşaçı toplaşmışdı.