Xəbər verdiyimiz kimi, bu gün Premyer Liqanın 2015-2016 mövsümünün püşkatma mərasimi keçirildi. AFFA-nın inzibati binasında reallaşan tədbirdə Peşəkar Futbol Liqasının prezidenti Ramin Musayev, Premyer Liqada iştirak edəcək klubların nümayəndələri və jurnalistlər iştirak etdilər. Tədbiri giriş sözü ilə açan Peşəkar Futbol Liqasının Mətbuat və İctimaiyyətlə Əlaqələr Departamentinin rəhbəri Aslan Şahgəldiyev iştirakçıları salamladıqdan və çempionatın formatı ilə bağlı məlumat verdikdən sonra jurnalistləri 22 iyul Milli Mətbuat günü münasibəti ilə təbrik etdi.
Mərasim zamanı PFL prezidenti Ramin Musayev  bir sıra məsələlərə aydınlıq gətirdi: “Hər birinizi salamlayıram. İlk növbədə jurnalistlərimizi Milli Mətbuat günü, klub nümayəndələrini isə yeni mövsüm münasibəti ilə təbrik edirəm. Hazırda klublarımız avrokuboklarda çıxış edirlər. Deyərdim ki, komandalar bizi sevindirir. Çempionatın reqlamenti ilə bağlı dəyişiklik yoxdur. 10 komandanın iştirakı ilə 4 dövrəli çempionat keçirəcəyik. Son vaxtlar edilən transferlər onu göstərir ki, komandaların yerli oyunçulara təlabatı artıb. Qarşıda bizi milli komanda səviyyəsində böyük imtahan gözləyir. Milli komandaya çox sayda oyunçu vermək istəyiriksə, yerli oyunçulara diqqət ayırmalıyıq".

Ramin Musayev AFFA və PFL tərəfindən  elan olunmuş teleyayım hüququ ilə bağlı tendərə münasibət bildirdi: "Bildiyiniz kimi, Premyer Liqada 10 komanda çıxış edəcək. Biz yayım hüququna görə ən azı 1 milyon istəmişik ki, gələn pulu onlar arasında eyni qaydada  bölək. Ümid edirik ki, hər şey yaxşı olacaq".

PFL prezidenti "Rəvan"ın Premyer Liqaya qayıdışı ilə bağlı belə danışdı: "Fors major” deyilən bir anlayış var. Bir komanda müraciət edib maddi durumunun yaxşı olmadığını deyir. Sözsüz ki, 9 komandalı çempionat ürəyimizdən olmazdı. Sağ olsun "Rəvan" rəhbərliyi bizim təklifimizi qəbul etdi. Onlar sentyabrın sonuna qədər lisenziya məsələsini həll edəcəklər. "Simurq" məsələsinə gəldikdə isə bu komanda çempionata həmişə rəng qatıb. Vəziyyət elə gətirdi ki, problemlər meydana gəldi. Sözsüz, "Simurq" üçün can yandıran tamaşaçıları başa düşürəm. Mən özümü kənar tutmuram. "Simurq"un Premyer Liqada oynamasını mən də onlar qədər istəyirdim. Ümid edirik ki, "Simurq" I Divizionda çıxış edəcək. Həyatda hər şey mümkündür. Elə böyük komandalar var ki, gözlənilməz şəkildə aşağı dəstəyə yuvarlanırlar. AFFA və PFL rəhbərliyi  "Simurq"un Premyer Liqada oynaması üçün görüşdü. Amma ümumi hesablamalardan sonra bu iş alınmadı. Biz Premyer Liqada oynamaq üçün sadəcə "Rəvan"a müraciət etdik. Onlar bizə sadəcə göstərilən etimada görə təşəkkür etdilər. Öz adımdan onlara təşəkkür edirəm".

Ramin Musayev ötən mövsüm maddi problemləri olan "İnter"in hazırkı durumuna da aydınlıq gətirdi: "İnter hazırda gözəl oyun nümayiş etdirir. Bu komandanın növbəti mövsümdə heç bir problemi olmayacaq".