Çempionlar Liqasının 2-ci təsnifat mərhələsində mübarizəyə qoşulacaq təmsilçimiz “Qarabağ” həmin mərhələdə Monteneqronun “Rudar” komandası ilə üz-üzə gələcək.
“Rudar” Monteneqronun Plevlya şəhərini təmsil edir. Hal-hazırda Monteneqronun yüksək liqasında (Birinci Liqa) çıxış edən klub 2014/2015 mövsümünün çempion adını qazanmaqla, Çempionlar Liqasının 2-ci təsnifat mərhələsində çıxış etmək hüququ qazanıb.
FK “Rudar” Darko və Duşko Sariç qardaşları tərəfindən idarə olunur.
Klub 1920-ci ildə “FK Brejnik” adı ilə təsis olunub. Komanda üç dəfə adını dəyişib və 1955-ci ildən indiki adı ilə çıxış edir. “Rudar” – azərbaycan dilinə “Mədənçi” kimi tərcümə olunur.
FK “Rudar”ev oyunlarını “Gradski” stadionunda keçirir. Stadion 10.000 tamaşaçı tutumuna malikdir.
“Rudar” Monteneqronun müstəqillik dövründən bu yana ikiqat ölkə çempionu (2009-2010; 2014-2015) olub və üç dəfə (2006/2007; 2009/2010; 2010/2011) ölkə kubokuna sahib çıxıb.
Heyətdə əsasən yerli futbolçular çıxış edir. Maraqlı məqam ondan ibarətdi ki, 5 legionerdən üçü Yaponiyadan, ikisi Serbiyadandır.
FK “Rudar” 4 dəfə UEFA Kubokunda (UEFA Avropa Liqası) və bir dəfə UEFA Çempionlar Liqasında Monteneqronu təmsil edib. Bir dəfə Çempionlar Liqasının birinci mərhələsində (2010/2011) San Marinonun “Tre Fiori” komandasını hər iki oyunda (4-1; 3-0) məğlub edib və bir dəfə də Avropa Liqasında (2013/2014) Ermənistanın “Mika” komandasını (1-0; 1-1) məğlub edərək növbəti mərhələyə vəsiqə qazanıb.
|