Bu gün Azərbaycan Kubokunun finalında “Qarabağ” və “Neftçi” klubları görüşəcəklər. Oyundan öncə hər iki komandanın baş məşqçisinin və 1 futbolçusunun iştirakı ilə mətbuat konfransı keçirilib.
Əvvəlcə mətbuat nümayəndələri önünə “Neftçi”nin baş məşqçisi Arif Əsədov və komandanın qapıçısı Aqil Məmmədov çıxdılar.
Arif Əsədov: “Oyuna yaxşı hazırlaşırıq. Komandamızın hədəfi Azərbaycan Kubokunu qazanmaqdır. Düzdür, bu il çempionluq uğrunda mübarizə apara bilmədik. Amma minimum vəzifəni yerinə yetirib, avrokuboklara gedirik. Çox istərdik ki, mövsümü kubokla yekunlaşdıraq. Qeyd etməliyəm ki, sabit heyəti olan “Qarabağ”a qarşı oynayacağıq. Hesab edirəm ki, azarkeşlər maraqlı bir oyuna şahidlik edəcəklər. Zədəlilər Əziz Quliyev və Flavinyo bu oyunda iştirak edə bilməyəcəklər. Amma çalışacağıq ki, onların yoxluğu hiss olunmasın. Bundan əlavə, deməliyəm ki, veteranların görüşündə iştirak etdim. Bu işi ərsəyə gətirənlərə öz təşəkkürümü bildirirəm”.
Aqil Məmmədov: “Bizi maraqlı oyun gözləyir. Gücümüzü ortaya qoyub, qələbə qazanmağa çalışacağıq”.
Daha sonra “Qarabağ”ın baş məşqçisi Qurban Qurbanov və komandanın futbolçusu Qara Qarayev mətbuat nümayəndələri ilə görüşdü. Qurban Qurbanov: “Düşünürəm ki, bizi maraqlı və gərgin oyun gözləyir. Yazılır ki, “Neftçi”də müəyyən problemlər var. Amma mən belə düşünmürəm. Bizim “Neftçi” ilə oyunlarımız hər zaman ağır keçir. Rəqibin heyətində zədəli oyunçular olsa da, formada olan futbolçular da az deyil. Final oyunu üçün heyəti müəyyənləşdirmişəm. Amma bunu açıqlamaq istəmirəm. Fərqli bir şey olmayacaq. Heyət sizin düşündüyünüz kimidir. Hazırda ancaq kubok oyununu düşünürük. Odur ki, müqaviləsi başa çatmaqda olan oyunçularla danışıqlar aparılmayıb. Finaldan sonra bu barədə danışacağıq”.
Qara Qarayev: “Düşünürəm ki, maraqlı mübarizə olacaq. Oyuna yaxşı hazırlaşırıq. Məqsədimiz qələbə qazanmaqdır. Komandamız yorğun ola bilər. Amma motivasiya yüksəkdir”.
|