Topaz Premyer Liqasının 34-cü turunda AZAL “Neftçi” ilə qarşılaşdı. Oyunu 9 nəfərlə başa vurmasına baxmayaraq, AZAL qapısının toxunulmazlığını qoruya bildi – 0:0.

Böyükağa Hacıyev, “Neftçi” klubunun baş məşqçisi: “Qarşımıza qoyduğumuz məqsədə nail ola bilmədik. AZAL-la oyunda qələbə qazanmaq istəyirdik, alınmadı. Heyətdəki çatışmazlıqlar özünü göstərdi. Araz Abdullayev və Ernest Nfor oynamırdı, buna baxmayaraq, Samir Məsimovun xoş təsir bağışladığını qeyd etməliyəm. Komandaya demişdim ki, bu iki oyunda qələbə qazansalar son turda onları Zaqatalaya səfər etməkdən azad edəcəm. Ora əvəzedici heyətlə getməyi, əsas heyətə kubok öncəsi istirahət verməyi düşünürdüm. Amma mübarizə sona kimi davam edəcək. “Qəbələ” bizi turnir cədvəlində keçdi, bu, müvəqqətidir. Gələn turda “İnter”lə qarşılaşacaqlar. Biz isə “Rəvan”ı udmağa çalışacağıq. Üçüncü yer uğrunda mübarizə Zaqatalada yekunlaşacaq. Əsas vəzifəmiz kuboku qazanmaqdır. Komanda bu gün yaxşı mübarizə apardı, amma məqsədimizə nail ola bilmədik. Son vaxtlar fərqli heyətlərlə oynayırıq, istədiyimiz effekti ala bilmədik. Cinahlardan hücum etməyi tapşırmışdım. Çünki rəqib azlıqda qaldıqdan sonra əsasən müdafiənin mərkəzində toplaşmışdı. Təəssüf ki, uşaqlar deyilən tapşırıqları yerinə yetirə bilmədilər”.

Tərlan Əhmədov, AZAL klubunun baş məşqçisi: “4 heç-heçədən sonra qələbə qazanmaq istəyirdik. İddiamız yoxdur, öz imicimiz üçün oynayırıq. Qələbə qazanmaq istəyirdik, ilk hissədə çox istəkli oynadıq. Hakimlik barəsində heç nə deməyəcəm. Hər iki qırmızı dəqiq idi. Mən də qırmızı almışam, amma baxır nəyə görə. Murad Ağayev rəqib cərimə meydançasında, qapımıza təhlükə olmayan zamanda qayda pozuntusuna yol verdi. Qol vura bilmirik, bu, məni düşündürür. Komandada üç gənc futbolçudan biri mövsümü bitirib, ikisi isə cəzalı duruma düşdü. Gələn turda kimlə meydana çıxacağımı bilmirəm. Əvəzedici heyətdə istədiyim səviyyədə futbolçu yoxdur. Hərdən yerli futbolçuları çox qınayırıq, amma bu il gələn legionerlərin də səviyyəsi yüksək deyil. Yaradılan epizodlardan heç olmazsa birini vurmaq lazımdır. “Neftçi” bu gün yüksək səviyyədə oynadı. Bundan əvvəlki oyunlarda da bu cür oynasaydı çempionatda xal itkisinə yol verməzdi”.