Topaz Premyer Liqasının 32-ci turunda “İnter” “Şəfa” stadionunda “Xəzər Lənkəran”la qarşılaşdı. Rəqibini 3-0 hesabı ilə məğlub edən paytaxt klubu çempionluq uğrunda mübarizəni davam etdirdi.

Mustafa Denizli, “Xəzər Lənkəran” klubunun baş məşqçisi: “Nə deyəcəyimi bilmirəm. Bir neçə həftədir ki, yaxşı oynasaq da, pis oynasaq da məğlub oluruq. Uğursuz bir seriyamız var, bu gün də davam etdi. Çevirə biləcəyimiz bir oyunda məğlub olduq. Bu psixologiya ilə də qələbə qazanmaq olmur. Uğursuz seriyanı qıra bilmədik. Hədəfimiz kubokda uğur qazanmaqdı. Təəssüf ki, yarımfinalda mübarizəni dayandırdıq. Premyer Liqada qazanacağımız bir şey yoxdur. Amma buna baxmayaraq, komanda uğuru çıxış etməlidir. Komandanın yetirmələrinə də diqqət yetirməliyik. Bu layihəni rəhbərliklə bir daha müzakirə edəcəyik. Məğlub olduğumuz üçün üzülürəm. Çox az sayda yerli futbolçulara sahibik. Formada olsalar da, olmasalar da məcburiyyətdən onları meydana buraxırıq. Biri zədələnəndə nə edəcəyimizi bilmirik. Hamısı mövsüm boyu çox çalışdı, komandanın yükünü çəkdilər. Xüsusən də Tural Cəlilov, Elnur Abdullayev, Rahid Əmirquliyev və Rasim Ramaldanov. Qış fasiləsində bəzi oyunçuları heyətimizə cəlb etmək istəyirdik, alınmadı. Transferlər etməyimiz şərtdir. Hər bir futbolçunun problemi ola bilər”.

Kaxaber Sxadadze, “İnter” klubunun baş məşqçisi: “Komandamı parlaq qələbə ilə təbrik edirəm. Bizim üçün qalib gəlmək vacib idi. Tədricən avrokuboklara vəsiqə qazanmağa daha da yaxınlaşırıq. Bizim komandaya xas olan qol vurduq. Bunun üzərində məşqlərdə işləyirik. İlk qoldan sonra praqmatik oyun göstərdik. Rəqib hesabda geri düşdükdən sonra müdafiədə boşluqlar buraxırdı. Futbolçularımız da bu boşluqlardan istifadə etməyə tələsirdilər. Bunun nəticəsində oyun qarşılıqlı hücumlarla keçdi. Sürətli hücum edir və geriyə çəkilməyə məcbur olurduq. Bütün əvəzetmələrimiz uğurlu oldu. Bu oyunu artıq unutmalıyıq. Qarşıda “Sumqayıt”la çətin oyunumuz var. Rəqib gənc futbolçulardan ibarət olan prinsipial komandadır”.