![](uploads/inter.jpg) Topaz Premyer Liqasının 30-cu turunun mərkəzi
oyununda “İnter” “Neftçi”ni qəbul etdi. Paytaxt derbisində 2-1 hesabı ilə qələbə
qazanan “İnter” turnir cədvəlində ikinci pilləyə yüksəldi.
Böyükağa Hacıyev, “Neftçi” klubunun baş məşqçisi:
“Gərgin oyun oldu. Komandalar bir-birini yaxşı tanıyır. Oyunda üstünlük
bizdə idi, top dirəkdən qayıdırsa, deməli, qələbə qismətimizdə deyildi. “İnter”
ilk hissədə qol epizodu yaratmadı. Bundan sonra ikincilik uğrunda mübarizə “Neftçi”
və “İnter” arasında gedəcək. “Bakı” və “Qəbələ” bu gün xal itirərək ikincilik
uğrunda yarışda bizdən geri qalırlar. Əsas məqsədimiz qarşıdakı oyunlarda qələbə
qazanıb mövsümü ikinci yerdə bitirməkdir. Bütün komandalar, eləcə də “İnter”, “Neftçi”yə
qarşı başqa cür köklənirlər. Rəşad Sadiqov oyunda əlindən gələni etdi. Oyundan
sonra videoyazıya baxıb oyunçularla söhbət edəcəm”.
Kaxaber Sxadadze, “İnter” klubunun baş məşqçisi: “Futbolçularımı
təbrik edirəm, layiqli qələbə qazandılar. Oyuna yaxşı başladıq. Hava isti
olduğu üçün oyunda sürət aşağı idi. Lakin hər iki komandada faydalı iş əmsalı
yüksək idi. Çempionatın səviyyəsi yaxşıdır. Bu oyunu artıq unutmalıyıq. Müəyyən
çatışmazlıqlarımız oldu, bunları təhlil etməliyik. Qarşıda 6 oyun var, hər biri
bizim üçün final kimidir. Mövsümü ilk üçlükdə bitirmək üçün həm fiziki, həm də
psixoloji cəhətdən hazırlıqlı olmalıyıq. “Neftçi” kubokda layiqli qələbə
qazanaraq yarımfinala yüksəldi. Hesabda irəli çıxdıqdan sonra təşəbbüsü rəqibə
verdik. Hesab bərabərləşdikdən sonra komandaya daha aktiv oynamağı tapşırdım.
Mahir Şükürovla aramızda yaxşı münasibət var. Emosiyalara qapılmamağı dedim.
Futbolçular bütün fikirlərini oyuna versələr yaxşı olar”.
|