Topaz Premyer Liqasının 26-cı turunun son oyununda “Neftçi”
doğma meydanda AZAL-ı məğlub edərək turnir cədvəlində 2-ci pilləyə yüksəldi –
2:1.
Şakir Qəribov, AZAL klubunun məşqçisi: “Bugünkü oyun çox çətin
idi. Komandamızda dəyişiklik oldu, bu da oyunumuza təsir etdi. Məğlub
olmağımıza baxmayaraq, komanda yaxşı təsir bağışladı. İlk hissədəki qol
imkanlarından istifadə edə bilmədik. Oyunu bərabərləşdirmək lazım idi.
Yaratdığımız qol epizodları həm bərabərlik, həm də qələbə qazanmaq üçün kifayət
edərdi. Yaxşı oyunlarımızdan birini oynadıq. Vaqif Sadıqovun oyundan bir gün
öncə komandadan ayrılması hamımıza təsir etdi. Onunla komandaya gəlmişəm,
onunla da gedəcəm. Vaxtında buraxılan səhvlər öz nəticəsini göstərir. Vaqif
Sadıqov Azərbaycanın ən güclü məşqçilərindən biridir”.
Böyükağa Hacıyev, “Neftçi” klubunun baş məşqçisi: “Maraqlı
oyun alındı. Bir komanda hücum edirdi, digəri müdafiə olunurdu. Baş məşqçi dəyişikliyi
rəqib komandanın oyununa təsir edib. Vaqif Sadıqovun dövründə AZAL daha istəkli
oynayırdı. Ona böyük hörmətlə yanaşıram. İki top fərqi ilə irəli keçdikdən
sonra Bahodır Nasimovun bir neçə qol imkanı oldu, amma istifadə edə bilmədi.
Yolumuza davam edirik. Qarşıda “İnter”ə qarşı keçirəcəyimiz kubok oyunu var.
Bundan sonra “Rəvan”la qarşılaşmamız var. Düşünürəm ki, çətin olmayacaq. Rəşad
Sadiqov özünü yaxşı hiss etmir, son zamanlar ona istirahət veririk. Mirhüseyn
Seyidov onun yoxluğunu hiss etdirmədi. Futbolda əvəzolunmaz futbolçu yoxdur. “Neftçi”də
kifayət qədər oyunçu var, qalır ki, 11-liyi düzgün seçəsən. Cavid İmamverdiyə
imkan yaratdım. Dünən əvəzedicilərdə oyuna çıxdı. Bir hissə oynayıb komandaya
qoşulmalı idi. O isə hər iki hissədə meydanda oldu. Bir az səhlənkar olduğu
üçün bu gün heyətdə yox idi. Öz karyeramı kiməsə görə qurban verə bilmərəm.
Qarşıda hələ 10 oyun var, çox şey ola bilər. Ernest Nfor səviyyəli futbolçudur,
komandaya lazımlıdır. Həm oyunqurucu, həm dayaq yarımmüdafiəçisi, həm də sırf
hücumçu kimi oynaya bilər. Ondan narazılığım yoxdur”.
|