Azərbaycan kubokunun 1/4 final mərhələsinin ilk oyunlarına “İnter” - “Neftçi” qarşılaşması ilə yekun vuruldu. Maraqlı və gərgin idman mübarizəsində keçən oyunda qalib müəyyən olunmadı – 1:1.

Böyükağa Hacıyev, “Neftçi” klubunun baş məşqçisi: “Kubok oyunları adətən ağır olur, mərhələ adlamaq üçün iki oyun oynayırsan. 1-1 hesablı bərabərlik bizim xeyirimizədir. Əsas odur ki, səfər oyununda qol vurduq. Düzdür, üstünlüyü saxlaya bilmədik. Bunun əsas səbəblərindən biri də 3 gün öncə “Qəbələ” ilə səfərdə ağır oyun keçirməyimizdir. “İnter” isə bizdən bir gün öncə oynamışdı. İrəliyə nikbin baxırıq, cavab oyununda bütün suallara aydınlıq gələcək. Flavinyonun stabil oyun göstərməyinə alışmışıq, o da insandır. Bu gün imkanlarından aşağı oynaması haqqında onunla söhbət edəcəm. Ümumilikdə komanda yorğun görsənirdi. Bir əvəzetmə ilə oyun sxemini dəyişdim. Məqsədim mərkəzi gücləndirmək idi. Bərabərlik qismət idi, səfərdə qol vurduq, məğlub olmadıq”.

Kaxaber Sxadadze, “İnter” klubunun baş məşqçisi: “Cari mövsümdə hələ bu cür oyun oynamamışdıq. “Neftçi”yə qarşı yüksək tempdə oynadıq, qol imkanları yaratdıq, təəssüf ki, istifadə edə bilmədik. Futbolçular çempiona qarşı yaxşı oynadılar, komanda layiqli oyun göstərdi. Buraxdığımız qol işimizi çətinləşdirir, səfərdə “Neftçi”yə qarşı oynamaq daha çətin olacaq. Komandaya iradım yoxdur, sürətli və baxımlı oyun oynadıq. “Neftçi” ilə oyunlarda heç vaxt belə üstünlüyümüz olmayıb. Səfərdə də belə oynasaq, növbəti mərhələyə çıxmaq şansımız olacaq. Çempionatın qrafiki sıxdır, oyunun yüksək tempini saxlamaq üçün əvəzetmələr etməli idik. “Neftçi” ikinci hissədə yorulmuşdu. Mikel Alvaro və Sezar Meza Kolli çox iş gördü. Əvəzetmələri düzgün etdiyimizi düşünürəm. İaşvili fərdi oyunu ilə “Neftçi”yə təzyiqi artırmağa kömək etdi. Baçananı bir az daha tez meydana buraxa bilərdik. Hesabda geri  düşdükdən sonra iki hücumçu ilə oynadıq. Hər ikisi ilk dəqiqələrdən oynasaydı bu cür effektiv olmayacaqlarını düşünürəm. 11 metrlik cərimə zərbəsinə baxmağa ürəyim dözmədi, ona görə soyunub-geyinmə otağına yollandım. Bu cür oyunda belə 11 metrlik cərimə zərbəsi verilməməli idi. Top çox yaxın məsafədən ələ dəymişdi. Çətin olsa da, həm kubokda, həm də Premyer Liqada sona kimi mübarizə aparmağa çalışacağıq”.