Topaz Premyer Liqasının 25-ci turunda öz meydanında “Xəzər Lənkəran”la qarşılaşan “Rəvan” oyunun son dəqiqələrində vurduğu qolla rəqibini 2-1 hesabı ilə məğlub etdi.

Mustafa Denizli, “Xəzər Lənkəran” klubunun baş məşqçisi: “Komediya kimi bir oyun oldu, deməyə sözüm yoxdur. Bu cür oyunla məğlub olduq. Belə hadisələr 20 ildə bir dəfə olur. Bir oyunda bu qədər qol epizodundan istifadə edə bilməyəsən və son anda qapından qol buraxıb məğlub olasan. Yuxu kimi bir oyun oldu, 5-6 qol epizodundan istifadə edə bilmədik. Ancaq uşaqlar belə səhvlər edə bilər. Bizim oynadığımız futbolla rəqibin oynadığı futbolun nəticəsi budursa, deməyə sözüm yoxdur. Oyunu uduzmaq olar, amma bu cür iki qol buraxmağa söz tapa bilmirəm”.

Güvenc Kurtar, “Rəvan” klubunun baş məşqçisi: “”Xəzər Lənkəran” oyuna yaxşı başladı. Rəqib əla komandadır, bizdən çox güclüdür. Buraxılan qoldan sonra toparlandıq, bərabərlik qolundan sonra isə oyunumuzu əks-hücumlar üzərində qurduq. Komandam yaxşı mübarizə apardı. Yeni komanda yaradırıq, 2 yeni oyunçumuz gəldi. Qapıçımız Kamal Bayramov bu gün yaxşı oynadı. Gənc futbolçuları yetişdirmək istəyirik. Qarşıdakı kubok oyununa ciddi hazırlaşacağıq, növbəti mərhələyə adlamaq istəyirik. KİV-də mənim barəmdə yazılanları oxumamışam. Buraya futbol adına nəsə etmək üçün gəlmişəm, getmək barədə düşünmürəm. Futbolçuların düzgün qidalanmasına nəzarət edirik. Gənc futbolçulardan Novruz Məmmədov öz üzərində işləsə, yaxşı futbolçu olacaq. Hamı nəticəyə baxır. Uğursuz olaramsa rəhbərlik məni göndərər. Məşqçinin bəhanəsi olmamalıdır. Nəticə varsa, işinə davam etməlidir, əks halda getməlidir”.