Topaz Premyer Liqasının 13-cü turunda AZAL klubu ilə qarşılaşan “Qarabağ” səfər oyununda xal itirdi – 1:1.

Qurban Qurbanov. “Qarabağ” klubunun baş məşqçisi: “Oyun ümumilikdə maraqlı keçdi. Meydanın hər yerində mübarizə gedirdi. AZAL bizim üçün çətin rəqibdir. Qol vurmaq şanslarımız oldu. AZAL belə oynasa bütün rəqiblərimizdən xal ala bilər. Hesab bərabərləşdikdən sonra rəqibin cərimə meydançasında olmağa çalışdıq. Komanda yaxşı oynadı, dincəlib, qarşıdakı oyunlara yaxşı hazırlaşmaq üçün vaxtımız var. Qara Qarayevi oyuna daxil etdim ki, topa daha çox nəzarət edək. Bu cür rəqiblə oyunda qol buraxmamağa çalışmalısan. Vaqif Sadıqov bizim oyunumuzu daha yaxşı araşdırıb, biz buna hazır olmalıyıq”.

Vaqif Sadıqov, AZAL klubunun baş məşqçisi: “”Qarabağ” bu oyunun favoriti olsa da, bizim öz hesablarımız var idi. Rəqib komanda oyunçularının fərdi ustalıq səviyyəsi bizimkilərdən daha üstündür. Sonda bu üstünlük qapımıza qolla nəticələndi. 8 oyundur ki, qalib gələ bilmirik, lakin komandam hər bir oyunda sonadək mübarizə aparır. Bugünkü oyunda da heyətlə bağlı problemimiz var idi. Bir neçə əsas oyunçumuzun xidmətindən istifadə edə bilmədik. “Qarabağ” kimi komandaya qarşı yaxın oynamalıyıq, başqa cür oynamaq olmaz”.