![](uploads/DSC_3535.jpg) Topaz Premyer Liqasında avqust ayının ən yaxşı futbolçusu
və ən gözəl qolun müəllifinin mükafatlandırılması mərasimində iştirak edən Peşəkar
Futbol Liqasının prezidenti Ramin Musayev fikirlərini bildirmişdir: “Uzun fasilədən
sonra həm Topaz rəhbərliyi, həm də KİV nümayəndələri ilə yenidən görüşdük. Topaz-la
əməkdaşlığa başladığımız gündən bu günə kimi razılığımızı bildiririk. Oyunların
yayım hüququ Topaz-a veriləndə bizi tənqid edənlər də oldu. Lakin, elə turlar
oldu ki, bütün oyunlar canlı yayımlandı. Hal-hazırda, orta hesabla 3-4 oyun televiziya
vasitəsi ilə canlı göstərilir. Klublar bir sıra hallarda canlı yayımdan imtina
edir, bunu azarkeş kütləsini itirməkləri ilə bağlayırlar. Yersiz tənqidlərə önəm
vermirik, səhvimiz olanda isə bunu bizə bildirməyiniz müsbət haldır. Bir neçə
KİV nümayəndəsinin müəyyən təkliflərini qəbul edib, həyata keçirdiklərimiz də
olub. Əsas məqsədimiz Azərbaycan futbolunun inkişafıdır. Çalışırıq ki, heç bir komandaya
qarşı haqsızlıq olmasın. Buna baxmayaraq, boş söz-söhbətlər çoxdur. Bir nəfər
desin ki, PFL kiməsə qarşı haqsızlıq edib. Öz vəzifəsini icra edə bilməyənlər
haqqında tədbir görülür. İşini bacarmayanla yollarımızı ayırırıq. Topaz-la 1
ildir ki, çalışırıq, bizim tərəfimizdən heç bir narazılıq yoxdur. Topaz-ın futbolun
inkişafı üçün öz töhfəsi var. Hər şey pulla həll olunmur. İnanıram ki, mövsümün
sonuna kimi daha böyük layihələr həyata keçirəcəyik. Yayım hüququ ilə bağlı indidən
növbəti mövsüm üçün təklif almışıq. Bunda KİV nümayəndələrinin də zəhməti var. İstədiyimiz
məbləği alacağımız təqdirdə KİV nümayəndələrinə də müəyyən ödənişlər olacaq”.
““Xəzər Lənkəran” – “Neftçi” oyunundan sonra baş verən qalmaqal
həddindən artıq şişirdilib. Azarkeşlər arasında yaranan narazılıqda xəsarət
alan olmursa, bu, qalmaqal deyil. Türkiyə çempionatının son turunda “Beşiktaş” –
“Qalatasaray” oyununda baş verənləri yerli azarkeşlər az qala bayram kimi qiymətləndirdilər.
Lakin bizə görə, bu, yaxşı hal deyil. Polisin və azarkeşin üstünə gedə bilmərik,
mən qalmaqal əleyhinəyəm. Futbola gələn insan burada istirahət etməlidir. Rəqib
komandanın azarkeşi ilə 90 dəqiqə rəqib olmaq lazımdır. Azarkeşlərlə,
fanatlarla düzgün iş qurulmur, klub rəhbərləri ilə mütəmadi görüşlər keçirmirlər.
“Xəzər Lənkəran”-ın ev oyunlarını azarkeşsiz keçirməsinə qarşı çıxdım. 5-10 nəfərə
görə azarkeşləri futboldan küsdürmək olmaz. Azarkeşlik təhqirdən kənar olmalıdır.
Oyunsonrası mətbuat konfranslarına bəzən komandaların baş məşqçiləri gəlmir.
Belə olan halda, İntizam Komitəsi onları cərimələyir. Mətbuat konfranslarında
sual verilməsinə çətinlik törədildiyini ilk dəfə eşidirəm”.
“Klublardan şikayət gəldi-gəlmədi, PFL hər turun bütün
oyunlarıınn videoyazısını izləyir. Hakim səhv edibsə, buna görə cəzasını alır. Çox
vaxt uduzan komanda günahı hakimdə görür. Hakimlərin tərəfini saxlamaq fikrim
yoxdur. Hakim səhvi olmayan heç bir çempionat yoxdur. Çalışırıq ki, heç bir
halda qərəz olmasın. Premyer Liqada çıxış edən 10 komandanın hamısı bizim üçün
eynidir. Sponsorların qarşısında bəraət qazanmaq üçün məsuliyyəti bizim üzərimizə
atırlar. İstədiyiniz hər hansı bir mübahisəli epizod bizdə var. Günahkarlar barəsində
mütləq ölçü götürülür. 8 baş hakimin hamısına derbi oyunların idarəçiliyini verə
bilmərik. Gələcəkdə daha gənc hakimlərə şans veriləcək, gəncləşdirmə siyasəti
aparılacaq. I Divizion və əvəzedicilərdə oyun idarə edən bəzi hakimlərə Premyer
Liqada oyun idarəçiliyi şansı yaradacağıq. 8 baş hakimdən 4-ü işindən uzaqlaşdırılarsa, bu halda xaricdən hakim dəvət etmək haqqında düşünə bilərik. Bizim tərəfimizdən Super Kubok üçün
hər şey hazırdır. Klublar üçün uyğun gün gözləyirik”.
|