Fevral ayının ən yaxşılarının mükafatlandırılması mərasimindən sonra KİV nümayəndələri üçün mətbuat konfransı təşkil olunmuşdur.

Ramin Musayev: “Bu mövsüm I divizion klublarının lisenziyalaşması ilə əlaqədar onu deyə bilərəm ki, gələn mövsüm Premyer Liqaya çıxmalı olan komandaya sponsor icazə verməsə, biz buna heç nə deyə bilmərik. Klub rəhbəbərlikləri ilə, klubların sponsorları ilə söhbət etmişəm, dəqiqliklə bilirəm ki, komandalardan birinin 100% gəlmək fikri var və çempionluq uğrunda mübarizə aparır. İkinci komanda da var, amma Premyer Liqada iştirak etməsi sual altındadır. Divizion komandalarını Premyer Liqaya çıxmağa məcbur edə bilmərik.

Topaz Premyer Liqasının AzTV-də canlı yayımlanan oyunlarının sayı qat-qat artıb, bu da sevindirici haldır. Jurnalistlərdən biri Divizion oyunlarının televiziya vasitəsi ilə yayımı haqqında maraqlı fikir irəli sürüb. Bunu da Topaz`la müzakirə edəcəyik. Divizionda da maraqlı oyunlar olur, ən əsası isə cavan futbolçuların oyunlarının işıqlandırılmasıdır”.

Azər Məhərrəmov: “Bir müddət öncə Gənclər İdman Nazirliyinin nəzdində olan AzərİdmanServis, əməliyyat şirkətimiz Azərİnteltek və AFFA tərəfindən imzalanan “etik normalar haqqında” müqaviləmiz var. Dünya praktikasında, Avropa və yerli oyunlarla bağlı  təşkilatçı tərəflər bir-birinə məlumat ötürür. Bu məlumatlar əsasında Risklərin İdarə Edilməsi Departamenti bunu araşdırır və nəticələrə uyğun olaraq rəhbərlik qərar verir. Danışılmış oyunlarla bağlı nəinki Azərbaycanda, həmçinin Avropa və Asiya liqalarında da oyunlar nəzarət altına alınır. Danışılmış oyunlar bir problemdir. Problemin həlli tək bizim ölkə ilə bağlı deyil, bunun araşdırılması üçün FIFA və İnterpol var. Bu yaxınlarda Avropanın müvafiq qurumunun iclasında mən də iştirak etdim. Danışılmış oyunlara Avropada ciddi önəm verilir. Mərc oyunları araşdırılır, əgər hansısa bir problem olursa oyun proqramdan çıxarılır. Topaz öz reklamını televiziya yayımı zamanı verir.  Bu yöndə PFL və AFFA bütün qapıları bizim üçün açıblar, ciddi işlər görülür, buna görə təşəkkürümüzü bildiririk”.

Nikolas Kanales: “Baş məşqçi Böyükağa Hacıyev son matçlarda oyunumla bağlı iradımı bildirib. Fikrimcə əsas olan oyunlarda lazım olan 3 xalı qazanmağımızdır”.

Asif Məmmədov: “Əvəllər milli komandaya cağrılmayanda deyirdilər ki, heyətə düşə bilmirəm, və ya zədəli olurdum. Çempionat başlayandan bütün oyunlarda oynamışam. İndiki vəziyyətdə milli komandaya çağrılmamağımın səbəbi özümə də maraqlıdır. Millinin üç günlük təlim-məşq toplanışına da dəvət olunmadım. Məndə elə bir fikir formalaşıb ki, Berti Foqs məni tanımır, məndən xəbəri yoxdur. Milli komandanın əsas toplanışlarında iştirak etmək istəyirəm. 3 günlük toplanışdan əsas yığmaya heç kim çağrılmır”.