Topaz Premyer Liqasının təsnifat mərhələsinin oyunlarını 262720 tamaşaçı izləyib. Nəticəsi ləğv olunan “Simurq” – “Rəvan” matçını nəzərə almasaq baş tutan 131 oyunda orta tamaşaçı sayı 2005-ə bərabər olub.

Azarkeş sayında mövsümün rekordu “Xəzər Lənkəran” – “İnter” matçında qeydə alınıb – 11000. Ən az azarkeş isə “Kəpəz” – “Simurq” qarşılaşmasında olub – 50. Bu matçlar müvafiq olaraq 19-cu və 22-ci turlarda keçirilib.

Ümumi azarkeş sayında isə “Xəzər Lənkəran” hamıdan öndədir. Cənubluların ev oyunlarını 69700 tamaşaçı izləyib. “Xəzər Lənkəran” bu göstəricidə 2-ci olan “Sumqayıt”ı 2 dəfədən də çox qabaqlayır. 3-cü pillədə isə “Kəpəz”dir. Əvvəlki mövsümlərdə olduğu kimi paytaxt da oynayan klublar yenə cədvəldə son pillələrdə qərarlaşıb.

Təsnifat mərhələsinin oyunları 8-i Bakıda olmaqla 15 müxtəlif stadionda keçirilib. Lənkəran şəhər stadionu topladığı tamaşaçı sayında böyük üstünlüklə zirvədə qərarlaşıb. Gəncə stadionu 2-ci, Sumqayıt isə 3-cü pillədə qərarlaşıb.