Topaz Premyer Liqasının 1-ci turundan təxirə
salınmış “Neftçi” – “Bakı” oyununda qalib müəyyən olunmadı – 1:1. Böyükağa Hacıyev, “Neftçi” klubunun baş məşqçisi: “Vurmayana - vurarlar prinsipi bu oyunda da özünü göstərdi. Komandanın fiziki durumu və
motivasiyası yaxşı deyildi. Legioner futbolçular qış fasiləsi yaxınlaşdıqca evlərinə
tez getmək barədə fikirləşirlər. Bugünkü görüşdə komanda çox aciz görsəndi. Təsəvvür
edə bilmirəm ki, “Bakı” ilə heç-heçə etmişik. Komandamı tanımadım. Mahir Şükürov
“Xəzər Lənkəran”la oyunda səhv etdiyi üçün start heyətində yer almadı. Ümumilikdə
bugünkü oyunda komandanın heç bir futbolçusunun oyunundan razı qalmadım”.
Bojidar Bandoviç, “Bakı” klubunun baş məşqçisi: “Son iyirmi
gündə “Bakı” sıx qrafikdə və güclü rəqiblərlə oynayıb. “Neftçi” ilə oyuna gələndə
üç saat tıxacda qaldıq, ona görə də stadiona istədiyimiz vaxt çata bilmədik.
Çox pis haldır ki, matçdan əvvəl oyunçularımın heç olmasa beş dəqiqə isinmə hərəkəti
etməsinə imkan verilmədi. Buna baxmayaraq, futbolçularımdan razı qaldım. Onlar
ikinci hissədə yaxşı oynadılar”.
|