Azərbaycan Kubokunda 2022/2023 mövsümünün püşkatma mərasimi keçirilib. AFFA-nın inzibati binasında keçirilən tədbirdə bildirilib ki, ölkə kuboku uğrunda bu mövsüm 14 komanda mübarizə aparacaq. Bunlar “Qarabağ”, “Neftçi”, “Zirə”, “Qəbələ”, “Sabah”, “Sumqayıt”, “Şamaxı”, “Səbail”, “Kəpəz”, “Turan Tovuz”, “Qaradağ Lökbatan”, MOİK, “Araz Naxçıvan” və “Mingəçevir” komandalarıdır. Peşəkar Futbol Liqasının texniki-idman direktoru Elgiz Abbasov püşklə bağlı detalları və bir yeniliyi açıqlayıb: “Bildirmək istərdim ki, builki yarış 1/8 final mərhələsindən start götürəcək. Ötənilki reytinq əsasında 3 səbət müəyyənləşib. İlkin mərhələ oyunlarında “Qarabağ” və “Neftçi” iştirak etməyəcək. 1/8 final mərhələsində cütün taleyini 1 oyun həll edəcək. ¼ final mərhələsindən finala qədər olan oyunlar 2 qarşılaşmadan ibarət olacaq. Kubok oyunlarında 7+4 limiti tətbiq olunacaq və oyunun əsas vaxtında 5 əvəzetməyə icazə veriləcək. Əgər oyun əlavə vaxta gedərsə, o zaman komandaların 6-cı əvəzetmə imkanı olacaq. Ev sahibini müəyyənləşdirmək üçün əlavə püşk atılmayacaq. Klubun nümayəndəsi püşkü çəkərkən artıq onun təmsil etdiyi komandanın meydan sahibi və ya qonaq olduğu da aydınlaşacaq. Azərbaycan Kubokunun final görüşü iyunun 3-də baş tutacaq”. Ardından püşkatma mərasiminə start verilib. Reytinqə uyğun olaraq, “Qarabağ” və “Neftçi” 1-ci, “Zirə”, “Qəbələ”, “Sabah”, “Sumqayıt”, “Şamaxı” və “Səbail” 2-ci, “Kəpəz”, “Turan Tovuz”, “Qaradağ Lökbatan”, MOİK, “Araz Naxçıvan” və “Mingəçevir” 3-cü səbətdə yer alıb.
Püşkün nəticələri:

22-23 noyabr
1/8 final
“Qəbələ” – “Araz Naxçıvan”
MOİK - “Səbail”
“Sabah” – “Qaradağ Lökbatan”
“Kəpəz” – “Sumqayıt”
“Şamaxı” – “Turan Tovuz”
“Mingəçevir” – “Zirə”

8-9 dekabr
¼ final
“Qarabağ” - “Qəbələ”-“Araz Naxçıvan” oyununun qalibi
“Mingəçevir”-“Zirə” oyununun qalibi – “Neftçi”
MOİK - “Səbail” oyununun qalibi - “Sabah” – “Qaradağ Lökbatan” oyununun qalibi
“Kəpəz” – “Sumqayıt” oyununun qalibi - “Şamaxı” – “Turan Tovuz” oyununun qalibi